టాగోర్ శతజయంత్యుత్సవాల సందర్భంగా ఫిలింస్ డివిజన్ తరపున సత్యజిత్ రాయ్ నిర్మించిన 'రవీంధ్రనాథ్ టాగోర్' డాక్యుమెంటరీ చిత్రం దేశవ్యాప్తంగా విడుదల అయింది. వివిధ ప్రాంతీయ భాషలలో దీనికి వ్యాఖ్యానం కూడా జోడించారు. ఇంగ్లీషులో దీనికి సత్యజిత్ రాయ్ స్వయంగా వ్యాఖ్యానం రచించారు. ఆయనే వ్యాఖ్యానాన్ని చదివారు కూడా.
విశ్వకవి శతజయంతి సందర్భంగా భారత ఫిలిం పరిశ్రమ యావత్తూ నేడు గురుదేవునికి శ్రద్ధాంజలి ఘటిస్తున్నది. రవీంద్రుని శతజయంతి సందర్భంగా ప్రత్యేకంగా నిర్మించబడిన చిత్రాలు ఈ వారం విడుదలైనాయి. దేశమంతటా అత్యంత వైభవంగా జరుగుతున్న సాంస్కృతిక కార్యక్రమాలలో ఫిలిం పరిశ్రమ గణనీయమైన పాత్రను నిర్వహిస్తున్నది.
